“Yaşıl dünya naminə həmrəylik ili” elan edilməsi ilə bağlı təsdiq edilmiş Tədbirlər Planı çərçivəsində rayonda görülən işlər və qarşıya qoyulan mühüm vəzifələrlə bağlı dəyirmi masa keçirilib

2024-cü ilin “Yaşıl dünya naminə həmrəylik ili” elan edilməsi ilə bağlı təsdiq edilmiş Tədbirlər Planı çərçivəsində rayonda görülən işlər və qarşıya qoyulan mühüm vəzifələrlə bağlı dəyirmi masa keçirilib. 16 mart 2026-cı il tarixdə Cəlilabad Rayon İcra Hakimiyyətinin inzibati binasında keçirilən iclasda Cəlilabad Rayon İcra Hakimiyyətinin başçısının birinci müavini Qalib Xudaverdiyev, rayon icra hakimiyyəti başçısı aparatının əməkdaşları, idarə və təşkilat rəhbərləri iştirak etmişdir.

Tədbirdə giriş sözü ilə çıxış edən rayon icra hakimiyyəti başçısının birinci müavini Qalib Xudaverdiyev Azərbaycanın qlobal iqlim dəyişikliyinin nəticələrinin yumşaldılması üzrə təşəbbüslərə dəstək verdiyini bildirib. Qeyd edib ki, Azərbaycan Respublikasının Prezidenti cənab İlham Əliyevin 25 dekabr 2023-cü il tarixli sərəncamı ilə Azərbaycanda 2024-cü ilin “Yaşıl dünya naminə həmrəylik ili” elan edilməsi cəmiyyətin qarşısında da mühüm vəzifələr qoyduğunu vurğulayaraq, ətraf mühitin qorunması və mühafizəsi sahəsində görülən işlərdə hər bir vətəndaşın üzərinə böyük məsuliyyət düşdüyünü qeyd etmişdir. O çıxışı zamanı rayon təşkilatlarının ətraf mühitin qorunmasına, yaşıllıqların salınmasında yaxından iştirak etməsinin vacibliyini bildirmişdir.

Həmçinin qeyd edib ki, ölkə başçısının tapşırığına uyğun olaraq ölkə üzrə, o cümlədən Cəlilabad rayonunda qarşıya qoyulmuş məqsədlərə uyğun olaraq, ətraf mühitin sağlamlaşdırılması, yaşıllıqların bərpası və artırılması, su ehtiyatlarından və dayanıqlı enerji mənbələrindən səmərəli istifadənin təmin edilməsi istiqamətində görülən işlər daha da gücləndirilməlidir.  

Tədbirdə iştirak edən idarə və təşkilat rəhbərləri yaşıllaşdırma aksiyalarının aparıldığını, ətraf mühitin qorunması, məişət tullantılarının təmizlənməsi və digər istiqamətlərdə tədbirlərin uğurla davam etdiriləcəyini bildiriblər.