İqtisadiyyat

2022-ci ildə Cəlilabad rayonunda kənd təsərrüfatı məhsullarının istehsalı və emalının dəstəklənməsi üzrə Dövlət Proqramında nəzərdə tutulmuş tədbirlərin icrası   daim diqqət mərkəzində saxlanılmış, kənd təsərrüfatında yüksək istehsal göstəricilərinə nail olunmuşdur. Rayon ərazisində 56700 hektarda buğda, 5300 hektarda arpa, 5000 hektarda vələmir, 3468 hektarda noxud, 360 hektarda mərci, 132 hektarda lərgə, 5450 hektarda kartof, 140 hektarda  tərəvəz, 14 hektarda qarğıdalı, 148 hektarda günəbaxan əkilmiş, 607 hektar çiyələk sahəsində və 1471 hektar üzüm bağında aqrotexniki işlər aparılır. Kənd təsərrüfatı məhsulları istehsalçıları tərəfindən 165600 ton buğda, 13250 ton arpa, 9500 ton vələmir, 3399 ton noxud, 378 ton mərci, 150 ton lərgə,  162600 ton kartof, 2601 ton tərəvəz, 112 ton qarğıdalı, 250 ton günəbaxan, 14082 ton çiyələk və 22913 ton üzüm istehsal olunmuşdur. Çiyələk və üzüm bağlarında aqrotexniki işlər aparılır. Rayonda 750 hektar sahədə kartof və 400 hektar sahədə qarğıdalı məhsulu üzrə təkrar əkin aparılmışdır. Təkrar əkindən 15800 ton kartof, 1200 ton qarğıdalı istehsal edilmişdir. Baramaçılığın inkişaf etdirilməsi üçün 12 qutu ipəkqurdu   kümçülərə paylanmış və 370.4 kiloqram barama istehsal edilərək “Şəki İpək” ASC-yə təhvil verilmişdir. Heyvanların cins tərkibi yaxşılaşdırılmış, rayona lizinq yolu ilə 874 baş cins mal-qara gətirilmiş, 5680 baş inək süni mayalandırılmışdır. Mayalanma yolu ilə 3594 baş bala alınmışdır. Heyvandarlığa göstərilən qayğı nəticəsində şəxsi və fermer təsərrüfatlarında  iribuynuzlu mal-qaranın sayı 91232 başa, qoyun-keçilərin sayı 112124 başa, quşların sayı isə 560200 başa çatdırılmışdır.  il ərzində 14796 ton ət, 73920 ton süd, 30.4 milyon ədəd yumurta, 217 ton yun istehsal edilmişdir. 

Uzunluğu 36.2 kilometr olan Təklə-Abazallı, Təklə-Şorbaçı-Mədətli-Novruzallı-Şötüklü-Bayxanlı-Məlikqasımlı, Şötüklü-Dostallı-Məşədilər-Məmmədrzalı- Şorbaçı, Şiləvəngə-Adnalı-Bədirli kəndarası avtomobil yollarının tikintisi başa çatdırılmışdır.

Rayonun fasiləsiz elektirik enerjisi ilə təmin edilməsindən ötrü elektirik şəbəkəsi tərəfindən müəyyən işlər görülmüşdür. 2022-ci il  ərzində rayon ərazisində 609 ədəd elektrik dayağı, 8270 metr naqil və 800 ədəd izolyator  dəyişdirilmişdir. Rayonun Təzəkənd, Hamarqışlaq, Allahverən, Güneyli, Xəlilli, Albalan, Qamışlıgöl, Sadatlı, Məşədilər, Novruzallı, Məlikqasımlı, Yusublu, Əsədli, Lallar, Buravar, Şatırlı və Pərdi   kəndlərində 10 və 0.4 kV-luq hava xətləri, elektrik dayaqları, transformator məntəqələri yenilənmişdir. Hamarqışlaq, Təzəkənd, Allahverən və Xəlilli kəndlərində işlər yekunlaşmış, abonentlər yeni kabelləşmiş şəbəkəyə qoşulmuşdur. Rayonun Xəlilabad, Qarağac, İncilli və Çünzəli kəndlərinin elektrik təsərrüfatında yenidənqurma işləri davam etdirilir. Üçtəpə kəndində 100 kVa transformator, Muğan kəndində 2 ədəd 160 kVa transformator quraşdırılaraq yeni güc məntəqələri yaradılmışdır. Rayonun Buravar, Xanəgah, Babalı,  Alar, Kazımabad,  Zopun, Kürdlər, Günəşli, Üçtəpə, Uzuntəpə, Söyüdlü, Çəmənli, Xanılı, Gülməmmədli, Sərhədabad, Şorbaçı və Privolnoye  kəndlərində zədələnmiş transformatorlar yenisi ilə əvəz olunmuş, Cəlilabad şəhərinin Z.Əliyeva küçəsində 400 kVa, Məmmədrzalı kəndində 160 kVa transformatorlar əsaslı təmir edilmişdir.   

Əhalinin qaz təchizatının yaxşılaşdırılması məqsədi ilə xidmət sahəsi tərəfindən  tədbirlər görülmüş, rayonun yaşayış məntəqələrinə təbii qazın normal verilməsi üçün qaz xəttlərində təmir-bərpa işləri aparılmışdır. Cəlilabad, Göytəpə şəhərlərində və rayonun kəndlərində ümumilikdə 11443 pm uzunluğunda yeni qaz xətti çəkilmiş və karroziyaya uğramış  403 pm qaz xətti yenisi ilə əvəz edilmişdir. Cəlilabad, Göytəpə şəhərlərində və kəndlərdə 23 ədəd siyirtmə quraşdırılmışdır. Cəlilabad, Göytəpə şəhərlərində, Privolnoye və Kazımabad kəndində şəhid və qazilərin evləri qazlaşdırılmışdır. "Azəriqaz" İB-nin daxili imkanları hesabına Cəfərli, Çünəxanlı və Həsənli  kəndlərinin qazlaşdırılmasında tikinti quraşdırma işləri başa çatdırılmışdır. Cəlilabad rayonunun müxtəlif ünvanlarında 7546 ədəd aşkar edilmiş  qazsızma halları aradan qaldırılmış, bu məqsədlə 852 ədəd qaz kranı,  144 ədəd fərdi qaz tənzimləyicisi dəyişdirilmişdir. Rayon ərazisində 1492 ədəd SMART tipli sayğac  quraşdırılmışdır.

Əhalinin içməli su ilə təminatının yaxşılaşdırılması məqsədi ilə rayonun Boyxanlı, Cəfərxanlı, Xəlilabad, Komanlı, Təzəkənd və Üçtəpə kəndlərində subartezian quyuları qazılmışdır. Cəlilabad şəhərində, Privolnoye və Uzuntəpə kəndlərində 75 metr köhnəlmiş  su xətləri yeni borularla əvəz edilmiş və 58 evə yeni su xətti çəkilmişdir. Cəlilabad şəhərində Şəhid ailələrinin, qazilərin və müharibə iştirakçılarının evlərinə ümumilikdə 293 metr su, 185 metr kanalizasiya xətti çəkilmişdir.

Əhaliyə göstərilən rabitə xidmətinin səviyyəsinin yüksəldilməsi məqsədi ilə şəhər və kəndlərdə 134 ədəd rabitə dirəyi təmir edilmiş 91 ədəd yeni dayaq basdırılmış, hava xətlərində təmir bərpa işləri aparılmışdır. 2022-ci ildə 446 ədəd yeni telefon xətti çəkilmiş, 788 ədəd telefon abunə borcuna görə  çıxarılmış və 449 ədədi borc ödənildikdən sonra bərpa olunmuşdur. Telefon istifadəçilərinin sayı 8386 nəfərə, 507 ədəd yeni internet xətti çəkilmiş, 407 ədəd borca görə çıxarılmış, internet istifadçilərinin sayı 6434 nəfərə çatdırılmışdır. Hazırda “Azeronline”  şirkəti tərəfindən əhaliyə internet xidmətinin yaxşılaşdırılması məqsədi ilə Göytəpə şəhərində, Kazımabad, Həziabad, Bəcrəvan, Məlikqasımlı, Komanlı, Şıxlar, Boyxanlı, Moranlı, Qarakazımlı, Sərxanlı və Soyuqbulaq  kəndlərində optik şəbəkənin tikintisi başa çatdırılmış və 2330  abunəçinin şəbəkəyə qoşulması təmin edilmişdir. Cəlilabad şəhərinin H. Əliyev prospektində, Z. Əliyeva, M. Hadi, M. Əzizbəyov, M. Hüseyn, M. Hüseynzadə, S.Ə.Şirvani, Səttərxan, Göytəpə şəhəri M.C.Paşayev küçələrində, Uzuntəpə kəndinin yeni yaşayış massivində GPON layihəsi üzrə tikinti işləri başa çatdırılmışdır. 

Rayonda meliorasiya-irriqasiya tədbirlərinin yaxşılaşdırılması  üçün 546.81 min m³ kanal lildən təmizlənmiş, 21191 hektar əkin sahəsi  suvarma suyu ilə təmin edilmişdir. Sel və daşqın sularından mühafizə tədbirlərinin həyata keçirilməsi sahəsində rayon ərazisindən keçən Mişarçay, Qarayarçay və  İncəçay çayları üzərində olan bəndlərdə sahilbərkitmə işləri aparılmışdır.  

Cəlilabad və Göytəpə şəhərlərində,  mənzillərin kanalizasiya xətlərində yaranmış nasazlıqlar aradan qaldırılmış, binaların zirzəmiləri çirkab sulardan təmizlənmişdir. Cəlilabad şəhərinin park və xiyabanlarında abadlıq və təmir işləri aparılmışdır. Cəlilabad və Göytəpə şəhərlərində yaşayış binalarının həyətindəki qanunsuz tikililər sökülmüşdür. Cəlilabad şəhərinin Zərifə Əliyeva küçəsində 12, 14,16,20, və 22 saylı binaların həyətində və Mehdi Hüseyn küçəsində 8, 11, 13 saylı binaların həyətində “Abad həyət” istirahət parkı tikilib istifadəyə verilmişdir.

Rayonun Albalan, Alaşar, Hasıllı və Cəfərli kəndlərində modul tipli məktəb binalarının və  Cəlilabad şəhərinin yeni yaşayış massivində 624 şagird yerlik 3 nömrəli tam orta məktəbin tikintisi başa çatdırılmış və istifadəyə verilmişdir. Vənlik, Həsənli və Söyüdlü kəndlərində modul tipli məktəb binalarının tikintisinə başlanılmışdır.